Su tempus
Maistra: Si faeddat de su tempus chi faghet e de sos tempos de festa in bidda.
Giuanne: Oe est una bella die de sole. Andades a mare?
Lio: Apo bidu sas previsiones e a sero poniat annuadu.
Lughia: A mie mi paret chi est pesende·si su bentu.
Marisa: Su mare in custos tretos si àgitat in presse e est perigulosu. Andat bene abarrare inoghe puru. Est una bidda ermosa e nch'at un'àera bella.
Giuanne: No ant a mancare àteras ocasiones pro andare a mare de seguru. Deo mi nche depo fuire. So foras totu su sero. Nos bidimus notesta.
Lughia: Non faghent nudda ocannu pro su santu? O su comitadu est dormidu che a semper?
Micheli: Pro pedire su dinari già sunt colados... lampu! Ant tentu su coràgiu de nde pedire a mie puru!
Lio: Mancari fiant brullende.
Micheli: Ei, brullende brullende e sèrios sèrios cun su cartulàriu in manu. E deo sèriu sèriu l'apo naradu chi fia ispiantadu, finas si carchi soddu in butzaca lu tenia.
Lio: Mi paret chi organizant un'addòbiu pro giòvanos cun unu grupu rap e unu rock.
Lughia: E in ue? Ispero chi non lu fatzant in pratza de crèsia che a s'àtera borta!
Lio: Non creo, si nono l'intendes su vicàriu! Penso chi siat foras de sa bidda.