Sos frastimos
Maistra: Non podiant mancare esèmpios de frastimos chi sunt frecuentes in su chistionare normale de onni die ca non semper totu andat bene.
Lughia: Sa màniga in s'intrada!? As bortuladu sa broca antiga? O l'as segada? Ohi Sant'Antoni meu!
Micheli: No l'isco.
Lughia: Pranghet tue... Torra a inoghe, torra! Si m'as segadu sa broca ti callento sas nàdigas bene bene! Su diàulu chi t'at fatu!
Lio: Ma mama, ti l'amus naradu bortas meda chi cussu non fiat su logu de pònnere cussa broca!
Lughia: Callia·ti a sa muda tue puru, mi'! Ohi sa broca mia bella! Gesucristu meu!
Lio: Isetamus carchi segundu e dae sas boghes cumprendimus si sa broca est segada...
Lughia: Maladitu sias Micheli! Oh ite dannu mannu!
Lio: Su gabinete est un'avolotu...
Lughia: Ohi.. sos frores mios bellos!
Lio: Sa broca est sarva!
Marisa: E Micheli puru!
Lughia: Micheli, in ue ses? Non ti cues, tanto est peus! Beni a assentare su gabinete si nono abarras cravadu in domo pro tres dies! E torra gràtzias a sa bona sorte tua!
Lio: Li est andada bene!