Cràstulas e cummentos
Maistra: Non podiat mancare una chistionada de cràstulas e de cummentos chi sunt cosas chi sutzedent onni die in cale si siat logu de su mundu.
Micheli: Nara Lio, ma a su cuntzertu depet bènnere finas cussa ficheta de sa sorre de Mateu?
Lio: No l'isco o Micheli, ma ti paret chi cussa si perdet s'ocasione? E s'ischit chi b'est Gaine at a murigare bene bene pro bènnere cun sa cumpangia giusta.
Marisa: Pro ite ite tipa est?
Micheli: Bella che su sole! Difatis non faghet a l'abbaidare!
Lio: Non ses obietivu Micheli, ses tue chi non la podes suportare.
Micheli: Pro ite no est una ruga? E non nàrgias fàulas ca cando ses cun sas amigas tuas la seis semper critichende!
Lio: Ca si cheret pònnere in mesu a totu. Est inteligente, ma si bi sunt pitzocos in giru si bortat in pudda pro si pònnere in mustra.
Micheli: E bestit istramba. Paret una remitana.
Lio: Cussa est sa moda metallara misturada cun cussa dark chi si usada in sos ùrtimos tempos ca est semper in fatu de Gaine.
Micheli: Ma Gaine la lassat a pèrdere semper.
Lio: E toca ca no est de gasi. Cando s'allindat est fintzas bellighedda. E lassa istare chi cussas de Gaine sunt totus chistiones.