Ite cheret nàrrere
Maistra: Pregontare su significadu de una paràula e torrare una risposta bene assentada est su chi amus a bìdere in custa unidade.
Lio: Luca m'at rispostu a su messàgiu. Sos duos grupos musicales si narant "Arrapados" e "Rockaus".
Marisa: Los connosco totus duos. Sa prima est una band de Cuartùciu e s'àtera est de Ceraxus, duas biddas atacadas a Casteddu.
Lio: Su faeddu "rapados" tenet unu significadu?
Marisa: "arrapare" cheret nàrrere a segare sos pilos curtzos che a sos cartzerados. Difatis tenent totus sos pilos tùndidos curtzos curtzos. Su nùmene cheret significare mùsica rap rebelle, de traessu, de pònnere in galera. Est unu de sos grupos meos preferidos.
Micheli: E Rocaus? Cussu puru paret sardu de giosso.
Marisa: Craru chi tenet unu sensu. Ant postu paris duos faeddos inglesos Rock e House, domo de su rock, ma in sardu sonat comente sa coniugatzione de su verbu "arrocai" chi narant in Campidanu: arrocaus e duncas rocaus.
Micheli: Ohia mommia, già faeddas complicadu!