Pedire permissu
Maistra: Pedire permissu, dare ispricatziones e bogare iscusas sunt sas atziones chi amus a intèndere in custa chistionada tra babbu e fìgios.
Lio: Oh ba'...
Giuanne: Nara...
Lio: A podimus andare a su cuntzertu istanote?
Giuanne: Eja, mi l'at naradu mama tua, benimus nois puru però. Faghimus una passigiada a pustis chena.
Micheli: Ma sunt prus de duos chilòmetros dae inoghe! Est a s'àteru chirru de sa bidda.
Giuanne: Binti minutos a pee. No est sa fine de su mundu! Cando essimus a sas noe e mesa, tenimus totu su tempus.
Lio: Ma nois tenimus apuntamentu cun Gaine ca depet festare sos annos.
Giuanne: Bene meda, gasi li faghimus sos augùrios nois puru. Tranchillos chi a pustis mama e deo andamus pro contu nostru a ascurtare sa mùsica. Ma tue, Micheli, torras a domo cun nois.
Micheli: E si est prenu de gente e non s'atzapamus?
Giuanne: Lio tenet su telefoneddu, lu lassat allutu. Andat bene?
Micheli: Ma non s'intendet nudda cun totu s'istragatzu e sa mùsica a sonu artu.
Giuanne: Basta chi su telefoneddu siat cun sa vibratzione e postu in sa butzaca de sos cartzones. Na' Micheli, ma a chie cheres improsare? La' chi si insistes ti lassamus in domo de giaju, casi bi l'aias fata, mi'.