De ue ses?
Maistra: A pustis de sa presentada sos pitzocos pregontant a Marisa de ue est e iscoberint chi issa connoschet prus limbas.
Mateu: Nara Marisa, ma de ue ses?
Marisa: Bivo in Macumere, so cumpàngia de iscola de Lionora.
Luca: Tenes s'edade nostra tando, batòrdighi annos?
Marisa: Nono. Tèngio trèighi annos ca apo incumintzadu s'iscola a chimb'annos.
Lio: Marisa est olandesa. Est nàschida in Amsterdam. Est torrada a Sardigna tres annos a como.
Mateu: E chistionas su sardu? Comente mai?
Marisa: Ca babbu e mama m'ant semper faeddadu in sardu. Issos narant chi su sardu est una limba che a totu sas àteras de su mundu. E a connòschere una limba in prus est unu vantàgiu.
Luca: Ma ischis s'olandesu puru?
Marisa: Emmo. Apo fatu s'asilu e sas elementares in Olanda e tèngio galu cuntatos cun sos cumpàngios meos de iscola tramite facebook e skype.
Lio: Marisa est brava cun s'inglesu puru! Nd'ischit de prus de sa professora nostra. Nessi lu chistionat.