Una proposta
Maistra: Fàghere una bella chistionada, longa e bene istruturada e fàghere una proposta: est su chi amus a bìdere in custa unidade.
Giuanne: Salude prenda mea. Totu bene?
Lughia: Salude maridu meu. Istracu ses?
Giuanne: Unu pagu. Ma oe est chenàbura e cras mi potzo pausare.
Lughia: Ite nde naras de andare a sa festa istanote?
Giuanne: Ah, su comitadu est resurtadu a concruire carchi cosa! E ite proponent?
Lughia: Unu cuntzertu pro giòvanos: rocu o rapa o ite dimòniu si narat.
Giuanne: Rock e Rap: podet andare. Custos grupos new-wave locales faghent unu pagu de burdellu ma sunt interessantes. Ma mugere mea, mi paret de cumprèndere chi mi ses faghende un'ambasciada?
Lughia: Ello nono! Fìgios tuos mi l'ant pregontadu. Ma paret chi a Marisa puru non dispraghet. A nàrrere sa beridade Micheli diat èssere fentzamentes in punitzione, mi', ca agiumai non mi segat sa broca pròpiu de antis a su gabinete, sa broca de mama, ma non teniat neghe ca nd'at bombitadu totu su gustu s'iscureddu.
Giuanne: Già li deghet ca pariat chi si la fiat ingullende sena matzigare cussa timbadda. E narat chi no li praghet. E como comente istat?
Lughia: Eh, giai istat bene, già est biatzu torra.
Giuanne: Ah, passadu l'est... Ti l'aia naradu bortas meda de non lassare sa broca in su gabinete ca fiat semper in mesu de ancas e non est su logu suo cussu
Lughia: Ohi, lassa·mi·nche sa conca in paghe tue puru! Como già est remunida bene.
Giuanne: E in ue lu faghent su cuntzertu? In pratza manna de seguru nono ca s'ùrtima borta preìderu Zosepe fiat a tzìrrios e minetzas de iscomùnigas a pustis de s'impiastru chi ant lassadu.
Lughia: Lu faghent in su parcu nou de "Sas codinas" o "Funtana ditzosa" mi paret chi si narat como.
Giuanne: Machines de su Sìndigu. E a it'ora est?
Lughia: A sas deghe. Tenimus tempus de chenare cun addà:siu.